imleacan3

Laoch Cheol na Cruinne gafa sa bhFrainc

Tá an ceoltóir Papa Wemba ón Chongo i dtrioblóid leis na hÚdaráis sa Fhrainc. Ghabh siad é ar an mhí seo caite, agus é curtha ina leith go raibh sé ag tabhairt imircigh isteach chun na hEoraipe ar chostas de 3500 euro an duine.
Tá cliú agus cáil ar Papa Wemba , nó Jules Wembadio Pene Kikumba mar is fearr aithne air sa bhaile, agus cuid mhór gradaim faighte aige as ucht a chuid ceoil. Meastar nach mbeadh gá ar bith aige le airgead póca ó fhiontar den chineál seo, os rud é go ndíoltar cuid mhór ceirníní dá chuid ar fud na cruinne, agus go mbíonn ceolchoirmeacha ollmhóra aige í dtíortha éagsúla, óna Stáit Aontaithe go dtí an tSeapáin.
Is cosúil go raibh na póilíní sa Bheilg agus sa Fhrainc ag coinneáil súil air le cúpla bliain anuas mar go raibh cuid mhór dona ceoltóirí a d'earcaigh sé i bPoblacht Dhaonlathach an Congo nach raibh tásc na tuairisc orthu tar éis dóibh teacht isteach chun na hEoraipe. Deir na hÚdaráis sa Fhrainc go bhfuil suas le 300 duine a tháinig isteach mar cheoltóirí ach nár phill ar Kinshasa.
Is laoch é Papa Wemba sa bhaile agus rinne a lucht tacaíochta ionsaí ar Ambasáid na Beilge in Kinshasa, sa bhliain 2001, tráth go raibh póilíní na tíre sin dá cheistiú.
Tá Wemba ina chónaí i measc an chosmhuintir agus pobal mór imircigh i mbruachbhaile de chuid Páras na Fraince, agus scaoileadh amach ar bhannaí é, mar go raibh imní ar na péas go mbeadh círéibeanna ann dá gcoinneofaí faoi ghlas é. Deir a lucht tacaíochta gur duine é a sheasann leis na daoine bochta ina thír dúchais, agus pobal na n-imirceach i bPáras na Fraince.